ಅಷ್ಟಾವಕ್ರಗೀತಾ - ೧೧

ಜ್ಞಾನ

 ಈ ಅಧ್ಯಾಯದಲ್ಲಿ ಅಷ್ಟಾವಕ್ರನು ಹೇಗೆ ಆತ್ಮಜ್ಞಾನ ಪಡೆದ ನಂತರ ಮನುಷ್ಯನು ಹೇಗೆ ಶಾಂತನು ಹಾಗೂ ಸುಖಿಯಾಗುತ್ತಾನೆ ಎಂದು ವಿವರಿಸುತ್ತಾನೆ. ಎಲ್ಲವನ್ನೂ ನಿರ್ಮಿಸಿದ ಆ ದೇವರು ಎಲ್ಲದರಲ್ಲೂ ಅಡಕವಾಗಿದ್ದಾನೆ. ಈ ಸತ್ಯವನ್ನು ಅರಿತಮೇಲೆ ಮನುಷ್ಯ ಎಲ್ಲಾ ಆಸೆಗಳನ್ನೂ ತೋರೆದು ಶಾಂತನಾಗುತ್ತಾನೆ. ವಸ್ತುಗಳ ಕ್ಷಣಿಕತೆಯನ್ನು ಅರಿತು ಅವುಗಳ ಮೇಲಿನ ಮೋಹವನ್ನು ತ್ಯಜಿಸುತ್ತಾನೆ. ಈ ಬಣ್ಣಬಣ್ಣದ ಪ್ರಪಂಚ ನಿಜವಾಗಿ ನೋಡಿದರೆ ಬರೀ ಶೂನ್ಯ ಎಂಬ ಸತ್ಯ ಅರಿತು ಸುಖಿಯಾಗುತ್ತಾನೆ.

ಅಷ್ಟಾವಕ್ರ ಉವಾಚ ..  

ಭಾವಾಭಾವವಿಕಾರಶ್ಚ ಸ್ವಭಾವಾದಿತಿ ನಿಶ್ಚಯೀ .
ನಿರ್ವಿಕಾರೋ ಗತಕ್ಲೇಶಃ ಸುಖೇನೈವೋಪಶಾಮ್ಯತಿ .. 11-1.. 

ಇರುವುದು, ಇಲ್ಲದಿರುವದು ಇತ್ಯಾದಿ ಬದಲಾವಣೆಗಳು ವಸ್ತುಗಳ ಸ್ವಭಾವ ಎಂದು ತಿಳಿದವನು, ನಿರ್ವಿಕಾರನಾಗಿ, ದುಃಖರಹಿತನಾಗಿ ಸುಖ-ಸಮಾಧಾನವನ್ನು ಹೊಂದುತ್ತಾನೆ.

ಜಗತ್ತಿನ ಸರ್ವ ವಸ್ತುಗಳೂ ಅಶಾಶ್ವತ, ಕ್ಷಣಿಕ ಎಂದು ಮನನ ಮಾಡಿಕೊಂಡುವನು ಐಹಿಕ ವಸ್ತುಗಳ ಬಗ್ಗೆ ಆಸೆ ಪಡುವದಿಲ್ಲ - ಅವು ಸಿಗದಾಗ ದುಃಖ ಪಡುವದೂ ಇಲ್ಲ. ಸುಖ-ಶಾಂತಿ ಹೊಂದುತ್ತಾನೆ. 

ಈಶ್ವರಃ ಸರ್ವನಿರ್ಮಾತಾ ನೇಹಾನ್ಯ ಇತಿ ನಿಶ್ಚಯೀ .
ಅಂತರ್ಗಲಿತಸರ್ವಾಶಃ ಶಾಂತಃ ಕ್ವಾಪಿ ನ ಸಜ್ಜತೇ .. 11-2.. 

ಈಶ್ವರನು ಸಕಲವನ್ನೂ ನಿರ್ಮಿಸಿದವನು. ಅವನ ಹೊರತು ಇಲ್ಲಿ ಏನೂ ಇಲ್ಲ ಎಂದು ನಿಶ್ಚಯವಾಗಿ ತಿಳಿದವನು, ಎಲ್ಲ ಆಸೆಗಳನ್ನು ತ್ಯಜಿಸಿ, ಯಾವುದಕ್ಕೂ ಅಂಟಿಕೊಳ್ಳವದೆ ಶಾಂತನಾಗಿರುತ್ತಾನೆ.

ಆಪದಃ ಸಂಪದಃ ಕಾಲೇ ದೈವಾದೇವೇತಿ ನಿಶ್ಚಯೀ .
ತೃಪ್ತಃ ಸ್ವಸ್ಥೇಂದ್ರಿಯೋ ನಿತ್ಯಂ ನ ವಾಂಛತಿ ನ ಶೋಚತಿ .. 11-3.. 

ಆಪತ್ತುಗಳು ಮತ್ತು ಸುಖ-ಸಂತೋಷಗಳು ತನಗೆ ಬರುವದು ವಿಧಿಯ ಮಾಯೆಯಿಂದಲೇ ಎಂದು ದೃಢವಾಗಿ ಅರಿತವನು, ತೃಪ್ತನಾಗಿ, ಇಂದ್ರಿಯ ನಿಗ್ರಹನಾಗಿ ಇರುತ್ತಾನೆ. ಅವನು ಏನನ್ನೂ ಆಶಿಸುವದೂ ಇಲ್ಲ, ಏನನ್ನೂ ಶೋಕಿಸುವದೂ ಇಲ್ಲ.

ಸುಖದುಃಖೇ ಜನ್ಮಮೃತ್ಯೂ ದೈವಾದೇವೇತಿ ನಿಶ್ಚಯೀ .
ಸಾಧ್ಯಾದರ್ಶೀ ನಿರಾಯಾಸಃ ಕುರ್ವನ್ನಪಿ ನ ಲಿಪ್ಯತೇ .. 11-4.. 

ಸುಖದುಃಖಗಳು, ಜನ್ಮ ಮೃತ್ಯು ಇತ್ಯಾದಿಗಳು ವಿಧಿಯ ಮಾಯೆ ಎಂದು ನಿಶ್ಚಯವಾಗಿ ತಿಳಿದವನು, ಬೇಕೆಂಬುದೆಲ್ಲಾ ಅಸಾಧ್ಯವೆಂದು ತಿಳಿದು, ನಿರಾಯಾಸನಾಗುತ್ತಾನೆ. ಮತ್ತು ಕರ್ಮಗಳನ್ನು ಮಾಡುತ್ತಿದ್ದರೂ ಅವುಗಳಿಗೆ ಅಂಟಿಕೊಳ್ಳುವದಿಲ್ಲ.

ಚಿಂತಯಾ ಜಾಯತೇ ದುಃಖಂ ನಾನ್ಯಥೇಹೇತಿ ನಿಶ್ಚಯೀ .
ತಯಾ ಹೀನಃ ಸುಖೀ ಶಾಂತಃ ಸರ್ವತ್ರ ಗಲಿತಸ್ಪೃಹಃ .. 11-5.. 

ಚಿಂತೆಯಿಂದ ದುಃಖ ಉಂಟಾಗುವುದೇ ವಿನಾ ಇನ್ನೇನೂ ಸಿಗುವದಿಲ್ಲ ಎಂಬುದನ್ನು ನಿಶ್ಚಯವಾಗಿ ತಿಳಿದವನು, ಚಿಂತಾಹೀನನಾಗಿ, ಸುಖಿಯಾಗಿ, ಶಾಂತನಾಗಿ, ನಿಸ್ಪೃಹನಾಗುತ್ತಾನೆ. (ಆಸೆಯಿಲ್ಲದವನಾಗುತ್ತಾನೆ)

ನಾಹಂ ದೇಹೋ ನ ಮೇ ದೇಹೋ ಬೋಧೋಽಹಮಿತಿ ನಿಶ್ಚಯೀ .
ಕೈವಲ್ಯಮಿವ ಸಂಪ್ರಾಪ್ತೋ ನ ಸ್ಮರತ್ಯಕೃತಂ ಕೃತಂ .. 11-6.. 

ನಾನು ದೇಹವಲ್ಲ. ದೇಹ ನನ್ನದು ಅಲ್ಲ ಎಂದು ದೃಢವಾಗಿ ತಿಳಿದವನು, ನಾನು ಕೇವಲ ಚೈತನ್ಯ ಎಂಬುದನ್ನು ನಿಶ್ಚಯವಾಗಿ ತಿಳಿದವನು, ಕೃತಾಕೃತಗಳ ಸ್ಮರಣೆ ಮಾಡದೇ, ಕೈವಲ್ಯ ಪ್ರಾಪ್ತನಾಗುತ್ತಾನೆ. 

ಆಬ್ರಹ್ಮಸ್ತಂಬಪರ್ಯಂತಮಹಮೇವೇತಿ ನಿಶ್ಚಯೀ .
ನಿರ್ವಿಕಲ್ಪಃ ಶುಚಿಃ ಶಾಂತಃ ಪ್ರಾಪ್ತಾಪ್ರಾಪ್ತವಿನಿರ್ವೃತಃ .. 11-7.. 

ಬ್ರಹ್ಮನಿಂದ ಆರಂಭವಾಗಿ ಹುಲ್ಲಿನ ಪೊದೆಯತನಕ ಇವೆಲ್ಲವೂ ತಾನೇ ಎಂದು ನಿಶ್ಚಯವಾಗಿ ತಿಳಿದವನು, ನಿರ್ವಿಕಲ್ಪನಾಗಿ, ಶುದ್ಧನಾಗಿ, ಶಾಂತನಾಗಿ, ಪ್ರಾಪ್ತ-ಅಪ್ರಾಪ್ತಗಳ ಚಿಂತೆಯಿಂದ ದೂರನಾಗುತ್ತಾನೆ.

ನಾನಾಶ್ಚರ್ಯಮಿದಂ ವಿಶ್ವಂ ನ ಕಿಂಚಿದಿತಿ ನಿಶ್ಚಯೀ .
ನಿರ್ವಾಸನಃ ಸ್ಫೂರ್ತಿಮಾತ್ರೋ ನ ಕಿಂಚಿದಿವ ಶಾಮ್ಯತಿ .. 11-8.. 

ನಾನಾ ಆಶ್ಚರ್ಯಗಳ ಈ ವಿಶ್ವ ಏನೂ ಅಲ್ಲ ಎಂಬುದನ್ನು ನಿಶ್ಚಯವಾಗಿ ತಿಳಿದವನು, ವಾಸನಾರಹಿತನಾಗಿ ಸ್ಫೂರ್ತಿಮಾತ್ರನಾಗಿ ಶಾಂತನಾಗುತ್ತಾನೆ.

 

ಸಂಪೂರ್ಣ ಕೃತಿಯನ್ನು ಡೌನ್ ಲೋಡ್ ಮಾಡಿ.